မဂ်က အနုသယကိလေသာပယ်ပုံ
မဂ်က ကိလေသာကိုပယ်တယ်၊ မဂ်ပယ်တဲ့ ကိလေသာဟာ ပစ္စုပ္ပန်ကိလေသာလား၊ အတိတ်ကိလေသာလား၊ အနာဂတ်ကိလေသာလား၊ ဘယ်ကိလေသာကို မဂ်ကပယ်တာလဲ။
အတိတ်ကိလေသာကတော့ ပြီးနေပြီ၊ သူ့ဟာသူ ပျောက်နေပြီ မဂ်ကပယ်စရာ မလိုဘူး၊ အနာဂတ်ကိလေသာက လာမှ မလာသေးပဲ၊ ဘယ့်နှယ်လုပ်ပယ်မလဲ။ ပစ္စုပ္ပန်ကိလေသာကို ပယ်တာလား၊ ပစ္စုပ္ပန်ကိလေသာကို ပယ်ရင် မဂ်နဲ့ကိလေသာ အတူတူဖြစ်တယ်ဆိုတဲ့ သဘောသက်ရောက် သွားလိမ့်မယ်၊ မဂ်ဟာ အကုသိုလ်နဲ့ယှဉ်နိုင်တယ်ဆိုတဲ့ အဓိပ္ပယ် ရောက်သွားလိမ့်မယ်။
ဒါဖြင့် မဂ်ပယ်တဲ့ ကိလေသာ မရှိတော့ဘူးလား၊ ဒါဟာ အသိခက်တယ်၊ ရှင်းရှင်းပြောရရင်တော့ အနုသယ အကြောင်းညီညွတ်တဲ့အခါမှာ ဖြစ်ပေါ်နိုင်တဲ့ ကိလေသာကို ပယ်တယ်လို့ဆိုတာ။
ကိလေသာဆိုတာ တကယ်ဖြစ်နေရင် ပယ်လို့မရဘူး၊ ဖြစ်ကို ဖြစ်နေပြီ၊ မဖြစ်သေးတာလည်း ပယ်ဖို့ မလိုဘူး၊ ဖြစ်ပြီးသားလည်း ဖြစ်ပြီးသွားပြီ၊ ကိုယ်ပယ်စရာ မလိုဘူး၊ သူ့ဟာသူ ချုပ်သွားပြီ။
ဒါကြောင့် မဂ်က ကိလေသာကို ပယ်တယ်ဆိုတာ နောင်ဖြစ်ပေါ်ခွင့်ကို ပယ်တာ၊ အဲဒါနားလည်းဖို့ အရေးကြီးတယ်။
အဲဒါသိလိုက်တဲ့ အတွက်ကြောင့် အကြောင်းညီညွတ်သော်လည်း ကိလေသာ မပေါ်တော့ဘူး၊ ဘုရားရဟန္တာတွေ ကိလေသာပယ်ထားတဲ့အခါကျတော့ စိတ်ဆိုးစရာတွေ့ ပေမယ်လို့ ဘယ်လောက်ပဲ စိတ်ဆိုးအောင် လုပ်ပေမယ့်လို့ စိတ်မဆိုးတော့ဘူး၊ ဘယ်လောက်ပဲ ကြိုက်နှစ်သက်စရာတွေ့ ပေမယ်လို့ မကြိုက်နှစ်သက်တော့ဘူး။
ဘာနဲ့တူသလဲဆိုရင် နဂိုက သစ်ပင်ရှိတယ်ဆိုပါတော့၊ အသီးသီးနေတဲ့ သစ်ပင်ကို အသီးမသီးအောင် လုပ်လိုက်တဲ့အခါကျတော့ အသီးမသီးတော့တာ၊ အသီးသီးနိုင်တဲ့ အစွမ်းသတ္တိကို ပယ်ဖျောက်လိုက်တာ။
အဲဒီတော့ သစ်ပင်မှာ အသီးရှိနေမှတော့ ဒီအသီးတော့ မသီးအောင် လုပ်လို့ မရဘူးပေါ့၊ နောင်မသီးအောင် လုပ်တဲ့အခါမှာ သီးစေနိုင်တဲ့ အစွမ်းကို(တစ်နည်းနည်းနဲ့) ဖျောက်တယ်၊ ရှေးတုန်းကတော့ အဆိပ်ဆူးတွေ ဘာတွေနဲ့လုပ်တယ်။ အခုခေတ်တော့ နည်းလမ်းတွေသာပြီး ရှိပါလိမ့်မယ်။
အဲဒီလိုအမှန်က ဖြစ်ပေါ်နေတဲ့ ကိလေသာကို ပယ်တာလည်း မဟုတ်ဘူး၊ လွန်ခဲ့တဲ့ ကိလေသာကို ပယ်တာလည်း မဟုတ်ဘူး၊ လာလတံ့ ကိလေသာကိုပယ်တာလည်း မဟုတ်ဘူး၊ ပယ်လို့မှ မရပဲ အကြောင်းညီညွတ်ရင် ဖြစ်ပေါ်နိုင်တဲ့ သဘောတရား အနုသယ ကိုပယ်တာ။
အနုသယဆိုတာ မဂ်ဉာဏ်နဲ့မှ ပယ်နိုင်တယ်၊ ၀ိပဿနာနဲ့လည်း အနုသယကို မပယ်နိုင်သေးဘူး၊ မဂ်ကျမှ အနုသယကို ပယ်နိုင်တယ်၊ အဲဒီလို မဂ်က ကိလေသာကို ပယ်တယ်ဆိုတာ အနုသယသဘောကို ပယ်တာ။
ကိလေသာလို့ ပြောလိုက်ရင် ကိလေသာက ဥပါဒ် ဌီ ဘင်အားဖြင့် ထင်ရှားဖြစ်နေပြီ၊ အဲဒီအခါမှာ ပယ်လို့ မရဘူး၊ အကယ်၍ ပစ္စုပ္ပန်ကိလေသာကို ပယ်တယ်လို့ပြေရင် မဂ်နဲ့ကိလေသာ အတူတူဖြစ်နိုင်တဲ့ အဓိပ္ပာယ်ရောက်သွားမယ်။
အဲဒီလို နောင်တစ်ဖန် မဖြစ်ခြင်းသဘောကို ရောက်စေတာလည်း ပယ်တယ်လို့ ဆိုတဲ့အတွက်ကြောင့်မို့ မဂ်ရပြီးတဲ့ ပုဂ္ဂိုလ်တွေမှာဆိုင်ရာ မဂ်နဲ့ပယ်သတ်ထားတဲ့ အနုသယ ကိလေသာဟာ ဘယ်လောက်ပဲ အကြောင်းညီညွတ်ညီညွတ် မပေါ်လာတော့ဘူး။
သို့သော် ဘုရားရဟန္တာတို့ကျတော့ ဘယ်လိုဟာမျိုးနဲ့တွေ့တွေ့ ကြောက်စရာတွေ့လည်း မကြောက်တော့ဘူး၊ နှစ်သက်စရာတွေ့လည်း မနှစ်သက်တော့ဘူး၊ စိတ်ဆိုးစရာတွေ့လည်း စိတ်မဆိုးတော့ဘူး၊ သတ္တိကိုက ခန်းခြောက်သွားပြီ၊ ကိလေသာဖြစ်နိုင်တဲ့ အနုသယသတ္တိ မရှိတော့ဘူး၊ အဲဒီလိုနည်းနဲ့ မဂ်က ကိလေသာကို ပယ်တာလို့ မှတ်ရမယ်။
မဂ်ပယ်ပြီးတဲ့နောက် ဖိုလ်က ပဋိပ္ပဿဒ္ဓိ အနေနဲ့ ကိလေသာကိုပယ်တယ်၊ သူပယ်နည်းကတော့ သူများရိုက်နှက်ထားလို့ လဲကျနေတဲ့သူကို ကိုယ်ကထပ်ပြီး ထောင်း(မီးကို အခြားသူက ငြိမ်းသွားပြီးတဲ့နောက် ကိုယ်က ရေနဲ့ ထပ်လောင်း)တဲ့သဘော၊ ဖိုလ်က အဲဒီလို ထပ်ပြီးတော့ ငြိမ်းအောင်လုပ်တာ။
ဒါကြောင့် မဂ်ကိုရသွားတယ်ဆိုရင် ဆိုင်ရာ ကိလေသာကတော့ ပြုတ်ပြုတ်ပြုန်းသွားတာပဲ၊ နောက်ထပ် ဘယ်တော့မှ မပေါ်တော့ဘူး၊ ဒီနည်းနဲ့ မဂ်က ကိလေသာကို ပယ်တာ။
မဂ်က အနုသယကိလေသာပယ်ပုံ ဆောင်ပုဒ်
သစ်ပင်ကြီးကို၊ သီးမလို၍၊ ထိုထိုကြိတ်နင်း၊ အဆိပ်သွင်းက၊ အတွင်းခြောက်ပြီး၊
နောက်မသီးသို့၊ ဤနည်းပမာ၊ ပင်ခန္ဓာဝယ်၊ ထပ်ကာကိလေ၊ မသီးစေဖို့၊ လေးထွေ
မဂ်ဟု၊ အဆိပ်စုဖြင့်၊ ကြိတ်ထုသွင်းလတ်၊ အနုသယပြတ်သည်၊ နောက်ထပ်မဥပါဒ်
တော့ပြီ။
ဖလသမာပတ် ဖိုလ်ဝင်စားပုံ
အရိယာဖြစ်သွားပြီးတဲ့နောက် ဖလသမာပတ်ဆိုတာ ရှိတယ်၊ ဖိုလ်ဝင်စားတယ်၊ ကိုယ့်ကိုကိုယ် သောတာပန်ဖြစ်တယ်လို့ ထင်တဲ့သူဟာ သောတာပတ္တိဖိုလ်ပြန်ဖြစ်အောင် အားထုတ်စမ်းကြည့်လို့ရတယ်။ သောတာပတ္တိဖိုလ်စိတ်တွေချည်း အကြာကြီးဖြစ်နေသလား၊ ကိုယ့်မှာ လုပ်နိုင်သလား၊ ဖလသမာပတ်ဝင်စားနိုင်သလား၊ ၀င်စားနိုင်ရင် ဧကန် သောတာပန် ဖြစ်တယ်လို့ ဆိုရတော့မယ်။
အဲသလို ဖလသမာပတ် ၀င်စားတာက ဘာလဲဆိုတော့ မျက်မှောက်ဘ၀မှာ ချမ်းသာကို ခံစားချင်လို့တဲ့၊ အဲဒီတော့ အရိယာတွေ ခံစားချင်တဲ့ ချမ်းသာက ကိလေသာ ငြိမ်းအေးတဲ့ချမ်းသာ၊ နိဗ္ဗာန်ချမ်းသာကို ခံစားချင်တာ။
လောကီချမ်းသာခံစားချင်ရင်တော့ လောကီချမ်းသာအတိုင်းသွားရမှာ၊ အခုဟာက လောကုတ္တရာချမ်းသာ ဖိုလ်ချမ်းသာ နိဗ္ဗာန်ချမ်းသာကို ခံစားချင်တဲ့အတွက်ကြောင့် အရိယာပုဂ္ဂိုလ်တွေဟာ ဖလသမာပတ်ကို ၀င်စားတယ်၊ ဒုက္ခတွေထဲက ဒုက္ခနည်းနိုင်သမျှ နည်းသွားအောင်လုပ်တာ။
အရိယာဖြစ်ရင်ပဲ ဒုက္ခတော်တော်နည်းသွားပါပြီ၊ ဒါတောင်မှ အဲဒီထဲကထပ်ပြီး၊ ဒီထက်ကောင်းတဲ့ချမ်းသာ လိုချင်တော့ ဖလသမာပတ်ဝင်စားတယ်။
ဖလသမာပတ်ဝင်စားတဲ့အခါ ဘာလုပ်ရသလဲဆိုတော့ ၀ိပဿနာ ပြန်ရှုရတာ၊ ၀ိပဿနာပြန်ရှုပြီး ဉာဏ်ရင့်ကျက်လာတဲ့အခါကျတော့မှ ဖိုလ်စိတ်တွေ အကြာကြီးဖြစ်နေတာကို ဖလသမာပတ် ၀င်စားတယ်လို့ ခေါ်တယ်။
သောတာပန်ဖြစ်ပြီးတဲ့ ပုဂ္ဂိုလ်ဟာ သောတာပတ္တိဖလသမာပတ်ကို ၀င်စားနိုင်တယ်၊ သောတာပတ္တိဖိုလ်စိတ်တွေချည်း အကြိမ်များစွာဖြစ်နေတာ အကြိမ်ပေါင်း ဘယ်လောက်ဖြစ်တယ်ဆိုတာ မပြောနိုင်ဘူး၊ လက်ဖျစ်တစ်တွက်မှာ ကုဋေတစ်သိန်းဖြစ်နိုင် ပျက်နိုင်တယ်ဆိုတော့ တစ်နာရီဆိုရင် ဖိုလ်စိတ်တွေ အကြိမ်ပေါင်း မရေတွက်နိုင်ဘူး၊ ဘ၀င်အလျင်ကြီးများ သွားနေသလို အဲဒီအခါမှာ ဘ၀င်မခြားပဲနဲ့ ဖိုလ်စိတ်ချည်း တစ်ခါထဲတန်းသွားနေတာ။ ကိုယ်ရည်မှန်းသလော တစ်နာရီကြာပါစေဆိုရင် တစ်နာရီကြာမယ်၊ နှစ်နာရီကြာပါစေဆိုရင် နှစ်နာရီကြာတယ်။
သကဒါဂါမ်ဖြစ်ပြီးရင်လည်း သကဒါဂါမိဖလသမာပတ်၊ အနာဂါမ်ဖြစ်ပြီဆိုရင်လည်း အနာဂါမိဖလသမာပတ်၊ အရဟန္တာဖြစ်ပြီးရင်လည်း အရဟတ္တဖလသမာပတ်၊ အဲဒီလို ၀င်စားနိုင်ပါတယ်။
ဖလသမာပတ်ဆိုတာ အရိယာပုဂ္ဂိုလ်(သောတာပန်၊ သကဒါဂါမ်၊ အနာဂါမ်၊ ရဟန္တာ)တို့နဲ့ ဆိုင်တယ်၊ ကိုယ်ဆိုင်ရာ ဖလသမာပတ်ကို ၀င်စားနိုင်ပါတယ်။
အရိယာတို့၏ ဥစ္စာဖြစ်သော ထိုသာမညဖိုလ်၏ အမြတ်ဆုံး အရသာဖြစ်သော ထိုဖိုလ်ချမ်းသာကို ပညာရှိသောသူသည် ၀ိပဿနာပညာကို ပွားစေ၍ ခံစားရပေ၏။ ။
Ref: ၀ိသုဒ္ဓိမဂ်အဋ္ဌကထာ၊ သင်္ဂြိုဟ်ဘာသာဋီကာ(ဘာသာဋီကာဆရာတော်)၊ ၀ိသုဒ္ဓိမဂ်မြန်မာပြန်(မဟာစည်ဆရာတော်)၊ အဘိဓမ္မာသတန်း(အရှင်သီလာနန္ဒာဘိဝံသ)။
